نصائح مهمه لكل الكروشيهات

نصائح مهمه لكل الكروشيهات خصوصا اللي يملو من مشاريعهم وماتكمل

اولا:.. اختيار مشروع تكوني مقتنعه فيه جدا جدا ويكون مميز اتجنبو تقليد مشاريع غيركم لانه حتملو على ضمانتي والتكرار ممل لانه بتشوفيه في كل مكان تمل العين منه بسرعه وان كان ولابد من التقليد فضروري تدخلي افكارك وذوقك... عن نفسي اكره شي اشوف شغل وحده تعبانه فيه بس يفكرني بوحده غيرها لاني شوفتها مشتغلته قبلها فهمتوني?? .

ثانيا:.. توفير الكميه الازمه من الخيوط وزياده شي بسيط لفه لفتين احتياط اولا لانه لو خلص حتلاقي نفسك وقفتي شغل ويمكن ركنتيه ونسيتيه وثانيا ممكن لو رجعتي تشتري ماتلاقيه اصلا او ممكن تكون دفعه جديده تختلف فيها درجة اللون ياافتح درجه او اعمق درجه .

ثالثا:.. "اختياري" سنارتين من نفس القياس بس عشان تبدلي لو مليتي عن نفسي سنارتين او ثلاثه كمان وحده الومنيوم وحده بمسكه وحده خشب او بلاستيك وممكن كلها الومنيوم بس كل وحده لون انا كدا مزاجي مخمج ويمل من سناره وحده ههههههه .

رابعا:.. زبطي لنفسك ساعتين يومين و جلسه هاديه ومشروب افضل وقت للشغل من بعد الفجر للساعه 11 الضحى او من بعد المغرب الى قبل النوم بساعه وانتي اختاري الانسب لوضعك .

خامسا:.. لو شغلك يعتمد على وحدات حددي لكل يوم عدد محدد منها ونفس الشي لو اسطر او لفات حددي عدد تنهيه كل يوم اذا حصل يوم مااشتغلتي لاي سبب لا تزعلي وعوضي فيوم ثاني .

سادسا:.. الاصرار على اتقان العمل والنجاح فيه وابهار نفسك واللي حوليك وكل شخص حيشوف شغلك .

سابعا:.. اتجنبي تستشيري الاشخاص السلبيين اللي مايعجبهم العجب واللي في نص مشوارك تقولك مو حلو غيري اللون تعبتي نفسك في شي ماتحتاجيه غيري الفكره ومن ذي المحبطات .

ثامنا:.. نصيحه المشاريع الكبيره اتجنبي تشتغليها في ازعاج وزحمه مو عشان الناس ماتعطي خير هههههه لا لا لا لا.. بس تجنب لاكتشاف اخطاء تجلط وتلاقي نفسك رجعتي تفكي الشغل .

تاسعا:.. ادخلي تحدي مع نفسك واوعديها بمكافأة مرات اكافي نفسي بشي بسيط وتافه بس كذا للحماس زي رشفه من فنجان القهوه مثلا بشتغل عدد وردات كل ورده اخلصها اشفوط شفطة قهوه شوفتو كيف خخخخخ .

عاشرا:.. لاتحاولي تنبشي فمشاريع جديده وخلي كل تركيزك فمشروعك فقط .

نصيحه اخيره

دائما كوني طموحه في كل شي يخصك زي هواياتك لاترضي بالبسيط السهل لانو خايفه امل منه لانه صعب او يحتاج وقت اللي حابه تتميز فعلا لازم تتعب على هوايتها وتميزها عن كل اللي يمارسو نفس الهوايه وكل وحده وشطارتها .

تنبيه: اللي لسه في البدايه مو كل الكلام ينطبق عليهم بس بعد مايفهمو الشغل ماعاد لهم عذر ابد ابد ابد .

ملاحظه اهم من كل اللي سبق ترا الصوره عدله فعلا بتشتغل وهي متمدده نفس الحاله اللي تجيني دايما